Tatimet

Në Zvicër konfederata, kantonet, komunat dhe bashkësitë fetare sipas të drejtës publike marrin tatime (Steuern). Ka tatime direkte dhe indirekte. Tatimet më të rëndësishme direkte janë tatimi mbi të ardhurat dhe tatimi mbi pasurinë, këto duhet të paguhen direkt nga personi, që e ka detyrimin tatimor. Tatimet indirekte ndër të tjera janë tatimi mbi vlerën e shtuar, tatimi për duhan apo tatimi për naftë. Këto tatime përfshihen në çmimin e mallrave. Meqë kantonet dhe komunat kanë përgjegjësinë për shumë tatime, ekzistojnë dallime të mëdha në tatimet direkte mes vendbanimeve. Bashkëshortët tatimohen së bashku.

Personave të shpërngulur tani prej jashtë vendit iu zbritet tatimi mbi të ardhurat direkt nga rroga (tatim në burim, Quellensteuer). Lajmërimin e bën punëdhënësi për punëmarrësit.

• Lartësia e tatimit varet nga të ardhurat, prej gjendjes familjare (i pamartuar, i martuar, i divorcuar) dhe numrit të fëmijëve. Ndryshimet duhet të lajmërohen menjëherë.
• Prej tatimit në burim zbritje të ndryshme shtesë janë të mundur, p.sh. për depozitime në shtyllën nr. 3, interesa për borxhe, shpenzime të larta për sëmundje etj..
• Kush ka pasuri, duhet ta deklarojë atë dhe të paguajë tatime veçmas për këtë.
• Për të ardhura vjetore prej 120`000 frangave e më shumë duhet të dorëzohet një formular për deklarimin e tatimeve (tatim vjetor i rregullt).
• Kush është martuar me një bashkëshorte apo një bashkëshort me një pasaportë zvicerane apo leje për vendqëndrim pa kufizim C, duhet po ashtu të plotësojë një deklarim të tatimeve (tatim vjetor i rregullt).

Administrata tatimore e kantonit (Kantonale Steuerverwaltung) jep informacione të mëtejshme për tatimin në burim. Administrata tatimore e kantonit ndihmon në pyetje për tatimin mbi pasurinë.

Personat me pasaportë zvicerane apo me leje për vendqëndrim pa kufizim C ngarkohen me tatim vjetor të rregullt (ordentliche Besteuerung). Atyre nuk iu zbritet tatimi prej rrogës. Ata duhet të plotësojnë një formular për deklarimin e tatimeve dhe t'i paguajnë tatimet me faturë. Formulari për deklarimin e tatimeve mund të plotësohet edhe onlajn. Rekomandohet të bëhet një pagesë paraprake (Vorauszahlung). Lartësia e tatimeve të pritura mund të përllogaritet me llogaritësin e tatimeve (Steuerrechner).

Plotësimi i formularit për deklarimin e tatimeve është edhe për zviceranet dhe zviceranët diçka komplekse. Është e këshillueshme, që të kërkosh ndihmë gjatë plotësimit, kur e bën për herë të parë.